Hi, ooo, Blommie...

My sonneblomme begin blom! Ek het vanoggend hierdie blommetjie opgelet terwyl ek in ons vieslike tuin rondstap. Ek het hard probeer om die onkruid uit te roei, maar na die afgelope mal maand van werk en Hermine help om te trek en bedreiwighede by die kerk het ek min uitgekom by tuinmaak. So nou lyk dinge maar weer soos dit in Februarie gelyk het. Minus die koue en reen, darem :) Maar die sonneblomme gaan mooi lyk, en die Cosmos blom reeds. En dit maak die huisie in die ooste van hierdie stad myne. Dit voel lekker.

Vir die mense wat oplet in die klas - ek is nie in Skotland nie. Dit was vir lank die plan om hierdie bank holiday (langnaweek) in Skotland te gaan kamp saam met vriende, maar iewers tussen Dinsdag en Woensdag het ek besef dat ek so moeg is dat ek by die huis moet bly. So ek vat nou tyd af om my batterye te herlaai, bietjie die huis ordentlik skoon te maak en sommer net lui te wees. Die gawe ding van Skotland is dat dit nie haastig is nie, en ek reken dit sal nog ´n rukke wag vir my om ´n draai te kom maak. Ek is wel lekker lus vir reis, en hou heeltyd die websites dop vir nice deals. Soos Berlyn vir £100, 2 nagte en vlugte ingesluit. Heng dis cheap om van hier af te travel. Ek kan myself skop dat ek nou eers daarby kan uitkom.

Maar sodra die geleentheid kom, ek nie doodmoeg is nie, gaan ek weer plekke sien!

---

Terug in die roetine

London is vandag koud en nat. Die weermense raai dat dit nog weer gaan warmer wees voor winter hier opdaag, maar ek wonder. Ek is nou weer terug in ´n daaglikse roetine van werk en geld verdien - al is dit net tydelik. Dis hoekom die fotos opgedroog het :)

Dis lekker om weer onafhanklik te wees, en ek sit al klaar en spandeer my ponde op ´n virtuele manier... Daar is ook ´n lang naweek oppad, en sover klink dit vir my ons gaan Skotland, wat absoluut heerlik gaan wees. Ek gaan die kans kry om op Britse paaie te bestuur en ´n groot deel van die eiland plat te ry - ek sien baie uit daarna.

So ietsie oor my werk: Ek werk vir Expedia. Dis ´n groot maatskappy wat toerpakkette aanmekaar sit sodat ons gewone mens nie so hard hoef te dink aan ´n lekker naweek nie - hulle doen al die beplanning, jy click en daar gaat jy. Natuurlik het ek niks met daardie sy van die besigheid te doen nie. Ek is maar basies ´n kantoorslaaf wat help met filing en data invoer. En hier is die weird deel: Ek geniet dit. Dis basiese werk, en soms aan die vervelige kant - maar nooit lank nie. Ek helpin die finansies departement en sien gereeld van die syfers wat betrokke is om so groot besigheid te laat werk. Dis gereeld nog ´n skok om sulke huge bedrae te sien deur die boeke gaan. Ek het ook oneindig meer respek gekry vir boekhouers en ouditeurs - dis vrek baie pressure om so werk te doen.

Op my 2de dag het ek gaan luister na Anya Hohnbaum wat deur Expedia gekies is om die wêreld se blouste lug te gaan soek. Sy het 64,000 myl gevlieg met 56 vlugte na 20 bestemmings om die plek met die blouste lug te kry. Dit was vrek interessant om te luister na iemand so ou soos ek wat na al hierdie plekke gegaan het, met mense gesels het en op ´n soortvan wetenskaplike manier die blouste lug bepaal het. Gaan kyk hier vir die volledige resultate, maar ek kan wel sê dat Kaapstad 5de was - nie sleg nie. Die foto regs van Valsbaai het ek geneem in Januarie, 2 dae voor ek hierheen gevlieg het. Ek nie glo ek is al langer as 6 maande hier nie!

---