Life in the country lane

Gillingham, Kent, United Kingdom. Dis my nuwe dorp daai. Ek woon nou in die Suid-ooste van Engeland, 'n deel wat bekend is vir sy kastele, geskiendenis en poort na die res van Europa.

Ingeval ek dit nog nie op 'n ander manier laat hoor het nie, ek het toe uiteindelik werk gekry as 'n Ingenieur. Ek werk by Delphi, 'n baie groot enjin komponent verskaffer vir die motorindustrie. Ek woon sommer lekker naby aan die kantoor, en kan stap as ek die dag fluks voel. Die platteland se publieke vervoer is baie eenvoudiger as Londen s'n, so ek kyk maar uit vir 'n kar. Dit sal nogal lekker wees om weer my tjor te hê.

So tussen deur die trek en die blyplek soek en al die nuwe admin het ons darem kans gehad om die omgewing te gaan verken. Ek dink die ergste is ook nou eers verby, aangesien ek meestal almal gebel het, en alles uitgesorteer het rondom my nuwe blyplek. So hier volg, wat hopelik die begin is van nog baie fotos van die Kent distrik...

Hier is die ferry laai sone in Dover, waar mens sommer kar en al op 'n boot ry en 40km later in Frankryk is. Hulle sê mens kan op 'n mooi oop dag vir Frankryk sien, maar dis 'n lieg. Daar is nie so iets soos 'n mooi oop dag in die UK nie. Dis nogal mal om die ferries dop te hou. Daar is permanent so 2 of 3 sigbaar in die stukkie see om die hawe, en die lorries en karre beweeg die hele tyd oor die gekoekte stul pad wat in die hawe in loop. Ek sal dit eendag nog aanpak, maar nie vandag nie.
The white cliffs of Dover. Cue die lemmings. Mens moet so bietjie mooi na hierdie foto kyk. Ek staan hoog op, en hier stop Engeland baie skielik en val in die see in. Die kalksteen is spierwit, en mens se bas raak net so wit as wanneer jy teen 'n witbord gaan staan. Dis moeilik om sien in hierdie foto, maar doer onder by die water is 'n klein stukkie strand - maar net met klippiess. En 'n leer om daar te kom. Hier tan mens nie so lekker nie.
Pieter en ek, by 'n nice Ford Focus wat ek vir die naweek gehuur het. Pieter het kom kuier vanaf Amerika af terug na SA toe, en my en Hermine die perfekte verskoning gegee om Kent verder te gaan verken. En vir my om 'n kar te huur! Die Focus was OK, maar ek verkies die Mazda 3 wat ek in Skotland gehad het... verlang verlang verlang. Die geel stuff is rapeseed. Ja, jy het regelees, maar dink raap, nie die ander ding nie. Gaan lees gerus verder by die link, maar om op te som, rapeseed (ook Canola) word gebruik vir kookolie en bio-Diesel. Dis ongelooflik geel, en die HELE Engelse platteland staan tans toe onder die goed.
Leeds Castle. Hierdie is 'n regte foto. Die swaan is regtig. Die kasteel ook. Die plek het 'n baie lang geskiedenis en baie van Shakespeare se koning Henry's het hier uitgehang, of ander mense gehang. Ons het die oggend hier spandeer, en niemand gehang nie. Mens mag nie.


Hermine het wel aan hierdie boom gehang, en hom so bietjie gewen ook. Ons staan tans in die voorhof van die kasteel, op die eiland in die boonste kasteel. Terwyl ons daar was, het die direkteur van die kasteel se raad daar opgedaag. Niks fancy nie. Niemand het die ou aangekondig nie. Hy was net daar op besigheid. Maar mens kan so presence voel van geld. Die ou oommie het ook 'n manier gehad om daar rond te stap asof die plek syne is (wat dit eintlik is). Yikes. Daai sal 'n stewige cheque-boek wees.
Na die dag was ons absoluut pootuit, en het behoorlik nodig gehad om die volgende 2 dae te rus. Maar gou sal ons nog fotos neem van die plek.

Groete almal!